ဧရာဝတီတိုင်း အတွင်းရှိ နာမည်ကျော် ကမ်းခြေ အပန်းဖြေ စခန်းများဖြစ်သော ချောင်းသာ နှင့် ငွေဆောင် ကမ်းခြေများရှိ ဟိုတယ်အများစုသည် လာမည့် မြန်မာ့ နှစ်သစ်ကူး သင်္ကြန်ကာလတွင် ပုံမှန်ထက် အခန်းခဈေးနှုန်းများ တိုးမြှင့်မည်ဖြစ်သည်။ အခန်းခ မပြောင်းလဲသော ဟိုတယ်များ ရှိသော်လည်း အများစုမှာ ၃၀% မှ ၅၀% အထိလည်းကောင်း အချို့မှာ ပုံမှန်နှုန်းထားထက် ၂ဆခန့်အထိ လည်းကောင်း ပြောင်းလဲမည်ဟု သိရသည်။
ကမ်းခြေ ဟိုတယ်များသည် ဧည့်သည် အဝင်များသော ပွင့်လင်းရာသီတွင်သာ လုပ်ငန်းလည်ပါတ်ကြရပြီး မိုးတွင်းကာလတစ်လျောက် ပုံမှန်ပြုပြင်ထိမ်းသိမ်းမှု ပြုလုပ်သည်မှအပ လုပ်ငန်းများ ရပ်ဆိုင်းထားရလေ့ရှိကြောင်း၊ သင်္ကြန်ကာလတွင် အခန်းခများ ပြောင်းလဲသော်လည်း ကမ်းခြေတွင် သင်္ကြန်ကျလိုသူ များသောကြောင့် ပုံမှန်ထက်ပိုမို၍ ဝန်ဆောင်မှု ပေးရလေ့ရှိပြီး ဧည့်သည်ပိုမို ဝင်ရောက်လေ့ရှိကြောင်း၊ သင်္ကြန်တွင်း ကာလဖြစ်၍ အစားအသောက် မှအစ လိုအပ်သော လူသုံးကုန် ဆေးဝါး စသည်များ အသင့်ဖြစ်အောင် ကြိုတင်စီစဉ်ထားရလေ့ရှိကြောင်း ဟိုတယ်ဝန်ထမ်းတစ်ဦးမှ ပြောကြားပါသည်။
” ကျွန်တော်တို့မိသားစုကတော့ ဒီနှစ် ငွေဆောင်ကို သင်္ကြန်မတိုင်ခင် သွားမယ်။ မနှစ်ကလည်း ချောင်းသာကို သင်္ကြန်မတိုင်ခင်ရောက်နေတာ သင်္ကြန်လည်းကျရော အခန်းခက ကောက်ခါငင်ခါ ဈေးတက်တော့ ဆက်မနေဖြစ်ဘဲပြန်လာခဲ့တယ်။ သင်္ကြန်တွင်းဆိုရင် အစစအရာရာ ဈေးတက်တော့ ၄ရက်နေမယ့်အစား နှစ်ရက်လောက်ပဲ နေဖြစ်တယ်။ ဒီနှစ်တော့ ငွေဆောင်မှာ သင်္ကြန်မတိုင်ခင်လည်း ပွဲတော်တွေရှိတော့ ပိုပြီးအဆင်ပြေပါတယ် ” ဟု နှစ်စဉ် မိသားစုနှင့် အပန်းဖြေခရီး ထွက်လေ့ရှိသော ခရီးသွားတစ်ဦးမှလည်း ၎င်း၏အမြင်ကို ပြောကြားပါသည်။
ချောင်းသာ နှင့် ငွေဆောင် ကမ်းခြေများသည် လမ်းပန်းဆက်သွယ်ရေး ပိုမိုကောင်းမွန်လာသည်နှင့်အမျှ နှစ်စဉ်ပြည်တွင်းပြည်ပ ခရီးသွားဧည့်သည်များ ပိုမိုဝင်ရောက်လေ့ရှိပြီး ဒေသတွင်းပြည်သူများ၏ ပညာရေး၊ စီးပွားရေး နှင့် လူနေမှုဘဝ ဖွံ့ဖြိုးတိုးတက်မှုများ အပေါ်များစွာ အကျိုးသက်ရောက်မှုရှိကြောင်း သိရသည်။
